新體驗: 滑浪風帆

2018年05月05-06日 

天生對水特別有興趣，但偏偏細個就無去接觸需要去學嘅水上活動。一直只係逗留係泳池游水，去沙灘游出去浮台跳水。到而家大咗先發現其實真係有好多野玩但一直都未試過。

中小學時期因為outdoor pursuits day 接觸 kayaking，但只限於一年一次，並沒有真正學過。到近年因為接觸返多啲香港郊區，為求可以自己租獨木舟出海，去考獨木舟一二三星證書。

雖然已經學咗 kayaking 嘅基本技巧但一直都覺得滑浪／滑浪風帆好型，好似好好玩，最後終於睇準康文署嘅水上活動候補名額參加咗一連兩日嘅滑浪風帆基礎課程。

大美督兩日都非常好天，陽光普照。第一日（星期六）微風海面平靜，簡直係初學者嘅學習天堂，學咗最基本嘅上板，橫風航行，改變方向。

滑浪風帆係我試過咁多樣運動中對體能，平衡力，技巧要求最苛刻嘅一項。缺少任何一樣都唔會順利航行。 天生平衡力欠佳再加腳腕曾經數次拗柴，平衡力真係比一般人差。第一日因為風平浪靜相對容易係塊板平衡，最長個次都仲可以順利航行大概一分鐘多啲。因為技術欠佳一大風少少就控制唔到個帆便會跌落水。來來回回上水調整開始動作，消耗極多體力，但感覺還是良好。

到第二日，原本天文台預測一級風，本應為初學者練習作最佳場地。結果天氣不似預期，教練話風勢最強時為四至五級風，其實唔識合初學者落水，唔 expect 有同學仔可以維持航行一段時間。不出教練所料，我就係嗰啲同學仔。海浪對我而言實在太大好難平衡，結果不斷跌落水。風勢強勁，就算我維持到企係滑板上，我亦都控制唔到我張帆。成個上午同上半個下午無成功過維持航行。直至去到最後一個鐘，風勢終於稍微緩和，再者我終於大概 feel 到應該點樣控制張帆，結果我可以航行大概有或其多個一分鐘。個一刻教練係我後面睇住我點樣控制，最後都有鼓勵我話終於航行到一分鐘。個一刻心情都好激動亦好興奮，感覺突破難關突破自己。 

今次呢個體驗十分好玩刺激，當中大部分係因為我哋呢班好好彩遇到一個120分嘅教練『李萬全』。李教練非常有經驗，非常有心教，亦好有耐性，好多小貼士，亦都教授好多其他初級班唔會學到嘅技術。同時我哋呢一班啲同學仔好啱 key，可能係大家都好鍾意上水活動真心想學再練習去玩。

相信今個夏天會經常落水。